माझं खूप प्रेम आहे तुझ्यावर.....।।'s Post

असेल यशाच्या शिखरावर तेव्हा सर्वांचीच साथ असेल..
आज अपयशाच्या पायऱ्यांवर ठोकर खातोय तेव्हा पाठीवर कोणाचा हात असेल..
त्याचाच मी चाहता असेल,

तशी मला अपयशाची तमा नाही,
आणि नाही संकटांचे भय..
यशाच्या वाटेवर पडताना कोणी
दोन शब्द धैर्याचे देत असेल..
त्याचाच मी चाहता असेल,

रोज जगून मरणाऱ्यांची संख्या कमी नाही
संकटांशी झुंजत जगणाऱ्यांच्या पाठीशी
ज्याचा नि:स्वार्थ पाठिंबा असेल..
त्याचाच मी चाहता असेल,

दु:ख आहे प्रत्येकाच्या आयुष्यात
आणि ते असणारच जीवनात..
त्या दु:खातही कोणी आपले
मनोबल वाढवत असेल..
त्याचाच मी चाहता असेल,
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

तुतारी

एक तुतारी द्या मज आणुनि
फुंकिन मी जी स्वप्राणाने
भेदुनि टाकिन सगळी गगनें
दीर्ध जिच्या त्या किंकाळीने
अशी तुतारी द्या मजलागुनी 

अवकाशाच्या ओसाडीतले
पडसाद मुके जे आजवरी
होतील ते वाचाल सत्वरी
फुंक मारीता जिला जबरी
कोण तुतारी ती मज देईल?

रुढी, जुलूम यांची भेसूर
संताने राक्षसी तुम्हाला
फाडूनी खाती ही हतवेला
जल्शाची का? पुसा मनाला!
तुतारीने ह्या सावध व्हा तर!

चमत्कार! ते पुराण तेथुनी
सुंदर, सोज्वळ गोड मोठे
अलिकडले ते सगळे खोटे
म्हणती धरुनी ढेरी पोटे
धिक्कार अशा मूर्खांलागुनी

जुने जाऊ द्या मरणालागुनी
जाळुनी किंवा पुरुनी टाका
सडत न एक्या ठायी ठाका
सावध!ऐका पुढल्या हाका
खांद्यास चला खांदा भिडवूनी

प्राप्तकाल हा विशाल भूधर
सुंदर लेणी तयात खोदा
निजनामे त्यावरती नोंदा
बसुनी का वाढविता मेदा?
विक्रम काही करा, चला तर!

धार धरलिया प्यार जीवावर
रडतील रडोत रांडापोरे
गतशतकांची पापे घोरे
क्षालायाला तुमची रुधिरे
पाहिजेत रे! स्त्रैण न व्हा तर!

धर्माचे माजवुनी अवडंबर
नीतीला आणिती अडथळे
विसरुनीया जे जातात खुळे
नीतीचे पद जेथे न ढळे
धर्म होतसे तेथेच स्थ्रिर

हल्ला करण्या तर दंभावर तर बंडावर
शूरांनो! या त्वरा करा रे!
समतेचा ध्वज उंच धरा रे! 
नीतीची द्वाही पसरा रे!
तुतारीच्या ह्या सुराबरोबर

नियमन मनुजासाठी, मानव
नसे नियमनासाठी, जाणा;
प्रगतीस जर ते हाणी टोणा
झुगारुनी दे देऊनी बाणा
मिरवा नीज ओजाचा अभिनव!

घातक भलत्या प्रतिबंधांवर 
हल्ला नेण्या करा त्वरा रे! 
उन्न्तीचा ध्वज उंच धरा रे!
वीरांनो! तर पुढे सरा रे
आवेशाने गर्जत हर-हर!

पूर्वीपासूनी अजुनी सुरासुर
तुंबळ संग्रामाला करिती
संप्रति दानव फार माजती
देवावर झेंडा मिरवीती! 
देवांच्या मदतीस चला तर!

- केशवसुत
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

गुलाबी थंडी

सुर्याची स्वारी दूर-दूर निघाली
किरणांची मिठी सैल झाली
सैलशा त्या हातात चराचर गोठले
तरू-वेलीच्या मस्तीला शिशिराने ताडले

पाने एक-एक करून गळू लागली
फडफड पखांची घरट्यांत थांबली
पिल्लं पक्षिणीच्या उराशी बिलगली
जीवनवृक्षावर रूक्षतेची छाया पसरली

वारा मंद-मंद वाहू लागला
सर्वांगाला झोंबू लागला
शेकोटीभोवती गप्पांची रंगत रंगली
सुखदुःखाच्या आठवणींची गर्दि झाली

थंडीचा हा गारवा
देण्यास आनंद नवा
कसाही का असेना
हा नवचैतन्याचा गुलाबी थंडीचा महिना
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

रावण जळत असताना रावणाने
हसून गर्दीकडे बघितलं
तपासा स्वतःच्या चारित्र्याला
मोठ्यानं त्यानं विचारलं.

केलाय मी गुन्हा
सीतेचं अपहरण करण्याचा
प्रयत्न नाही केला
मर्यादेची सीमा ओलांडण्याचा.

दिवसाढवळ्या रस्त्यावर
अब्रूचे लचके तोडतात
सभ्यपणाचा आव दाखवून
दरवर्षी मला जाळतात.

तुम्हा मानवां पेक्षा
राक्षस ठरलो भारी
केला नाही अपमान
सीतेचा माझ्या दारी.

हुंड्याच्या लालसेपोटी
तुम्ही हजारो सीता जाळल्या
वंशाच्या दिवट्या साठी
गर्भात कळ्या मारल्या

हक्क नाही तुम्हांला
मला बदनाम ठरवण्याचा
प्रयत्न करा तुम्हीं
स्वतःचे चारित्र्य सुधारण्याचा!

तुमच्या समाधानासाठी दरवर्षी मला पेटवा
पण पेटवण्याआधी तुमच्यातील राम मला दाखवा !
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

जे जे घडते ते सारे अनपेक्षितच असते
अपेक्षा न ठेवणे कधी, हे ही बरेच असते

तुला बोलावण्याचा,अट्टहास नको आता
ज्यास यायचे तो येतो हे ही खरेच असते

का सुर्या तुझ्याभोवती,फिरते उगा पृथ्वी
विनाकारण असे फिरणे,तिचे हसेच असते

केलेस कितीही तरी,शेवटी कमी भासणार
जगाच्या गरजेपुढे तुझे,कर्म उणेच असते

तुझ्या असण्याला , किंमत आजवर नाही
तुझ्या नसण्यानेही येथे, घडले असेच असते
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

असह्य होणाऱ्या स्पर्शांचे काय करू?
खिळून असणाऱ्या डोळ्यांचे काय करू?

बालपणाला प्रौढ बनवले आहे मी,
मनात असलेल्या होड्यांचे काय करू ?

दु:ख शहाण्या दुनियेचे समजू शकतो
सुखात असणाऱ्या वेड्यांचे काय करू ?

माझ्या ओठांनाच बिलगले ओठ तुझे
इतक्या हृदयाच्या ठोक्यांचे काय करू ?

प्रसन्न हा चेहरा पुन्हा दाखवला मी,
तुला न दिसलेल्या आठ्यांचे काय करू ?
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

*बायको वाल्याकोळयाची*

बायको कशी असावी ?
बायको असावी तर, वाल्या कोळयाच्या बायकोसारखी.....

रामायण न वाचलेला किंवा टीव्हीवर रामायण न पाहिलेला, निदान रामायण या ग्रंथाचे नाव माहिती नसलेला माणूस, या भारतात तरी अपवादानेच असावा. रामायण, म्हटले की, आम्हां भारतीयांचा ऊर केवढा भरुन येतो.
रामायण आपल्या संस्कृतीचा ठेवा असून रोजच्या जगण्यात, पावलोपावली त्याचे दाखले दिले जातात...!

'पुत्र असावा तर, प्रभुरामासारखा'!
'पती असावा तर, मर्यादापुरूषोत्तम श्रीरामासारखा !',
भाऊ असावा तर, लक्ष्मणासारखा !',
'पत्नी असावी तर, सीतेसारखी !'
'भक्ति व शक्ति असावी तर, ती हनुमंतासारखी'

*सहजच माझ्या मनात एका प्रश्नाने घर केले, बायको कशी असावी?*

मी तो प्रश्न आजपर्यंत बऱ्याच जणांना विचारला, खूप साऱ्या जणांनी त्याचे उत्तर त्यांना आवडणाऱ्या वेगवेगळ्या स्त्रियांचे दिले. अगदी रामायण महाभारतात असलेल्या आदर्श स्त्रिया ते अगदी आताच्या आघाडीवर असलेल्या अभिनेत्रीचे! खरं तर या सर्व दाखल्यापूर्वी आणखी एक दाखला आवर्जून द्यायला हवा.
तो म्हणजे,

*'बायको असावी तर वाल्या कोळ्याच्या बायकोसारखी !'*

*कारण तीच खरी रामायणकर्त्याची 'कर्ती ' आहे !* हे दुर्लक्षीत सत्य कायमच दुर्लक्षीतच राहिले आहे.

रामायणकर्त्या वाल्मिकी ऋषीच्या जडणघडणीसंबधी, अगदी जुजबी इतिहास सांगितला जातो.

वाल्याकोळी वाटसरूंना जंगलात
अडवून, प्रसंगी त्यांचे मुडदे पाडून, त्यांची लूट करुन चरितार्थ चालवायचा.
*एकदा नारदमुनींनाच वाल्याने अडवले. तेव्हा नारदमुनींनी त्याचे तिथल्या तिथे बौधिक घेतले!*

*'अरे मूर्खा हे पापकर्म कशासाठी करतोस ?' असे विचारल्यावर, 'माझ्या बायको-पोरांसाठी'!*
असं सांगितल्यावर, नारदमुनी त्याला म्हणतात!
*'जा तुझ्या बायकोला विचारुन ये, ते तुझ्या पापात सहभागी आहेत काय ?*
'तुम्ही इथेच थांबा, मी विचारुन येतो' असे म्हणत, वाल्या पळतच घरी येतो. दारावर धाडकन् लाथ मारुन घरात घुसतो. बायकोमुलं घाबरतात.
*वाल्या बायकोला धमकाऊन विचारतो. 'बोल तू माझ्या पापात सहभागी आहेस की, नाही?'*

आता असा विचार करा! *शेकडो माणसांचे मुडदे पाडलेला, खाद्यांवर लखलखती कुऱ्हाड घेतलेला, क्रुरकर्मा, दरोडेखोर नवरा असा संतापल्यावर, एक अशिक्षीत, अडाणी, परावलंबी स्री दुसरं काय उत्तर देणार?*

*पण नाही. त्या तडफदार आदिमाया शक्तीने, क्षणाचाही विचार न करता, *'नाही, मी तुमच्या पापात सहभागी नाही!'* असे सडेतोडपणे सांगितले.

नंतर

*तीच घटना वाल्या कोळ्यांचं आयुष्य पूर्णपणे बदलून टाकणारी ठरली.*

गरीबबापड्या बायकोच्या अनपेक्षीत तडफदार उत्तराने वाल्या कोळ्याचे डोळे खाडकन् उघडतात.
तो नारदमुनीची क्षमायाचना करतो. नारदमुनी त्याला दिक्षा देतात. तो तप करतो आणि दरोडेखोर वाल्या कोळ्याचा *वाल्मिकीऋषी* होऊन *रामायण* हे महाकाव्य रचतो.

ही सरळसाधी गोष्ट आपण वाचून सहज सोडून देतो. पण, एक साधी शंका कुणाच्याही मनात का येत नाही! की,
*समजा, वाल्या कोळ्याच्या बायकोने, 'व्हयं..आम्ही आहोतच की, तुमच्यासंग !' असं सर्वसाधारण, सोईचं उत्तर दिलं असतं तर?*

*नारदाचं काही खरं नव्हतंच पण, वाल्या कोळ्याचा वाल्मिकी ऋषी होऊन, त्याने रामायण तरी कसे काय रचले असते?*
अशी रास्त शंका घेता येऊ शकते !

*पापाचा पैसा कमावणाऱ्या पती -परमेश्वराला, उंबऱ्यातच अडवून ते पाप घरात घ्यायला, त्या पापात सहभागी व्हायला, आजच्या " "सुसंस्कृत भारतीय गृहिणी" नकार देतील तर, बोकाळलेला भ्रष्टाचार नक्कीच कमी होईल..!*

फक्त त्यांनी *वाल्याच्या बायकोचा आदर्श मात्र अंगिकारला पाहिजे.*
असे घडल्यास भारत भ्रष्टाचारमुक्त होऊन जागतिक महासत्तेच्या दिशेने निश्चित वाटचाल करेल !
*पुन्हा एकदा आपल्या भारत 'भूमी' वर निश्चितच रामराज्य अवतरेल व अनेक वाल्या कोळ्याचे वाल्मिकी मुनींमध्ये रुपांतरीत झालेले पाहण्याचे भाग्य आपणांस लाभेल...यात शंकाच नाही...!!!*
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

तुला पाहताना तुझा होत गेलो
अता काय माझे असे राहिले
तुझा मोह माझ्यामधे चेतला अन्
दिवे पंचप्राणातुनी तेवले

अशी मुग्ध लाही कधी सोसली ना
कधी पाहिला दाहही कोवळा
तिन्ही काळ देहात माझ्या अताशा
उमलतात सर्वांगस्पर्शी झळा

परी चंद्रमा येइतो स्वागताला
नभी पेटले चांदणे पाहिजे
तुझे दिव्य लावण्य ओवाळण्याला
मला कर्पुराचे जिणे पाहिजे ….
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

तु हसतेस जेव्हा जेव्हा
डोळ्यांत खेळवीत पारा
प्रश्नांची विरुनी शाई
मी होतो कागद कोरा..
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

विरहात तुझ्या तुला भेटण्या आतुर मी झाले.
तुझे स्वप्न देखता डोळे माझे पाणावले.
तुझे जवळ असणे सुखावते मला.
तुझ्या निस्वार्थी प्रेमाची ओढ वाटे मला
By: via माझं खूप प्रेम आहे तुझ्यावर.....।।

माझं खूप प्रेम आहे तुझ्यावर.....।।'s Post

रिक्तता लागूनही हातास माझ्या
मी पुन्हा गोंजारतो जगण्यास माझ्या

खोल असण्याच्या नको मारूस थापा
सांगुनी थकलो उथळ पाण्यास माझ्या

थांबला मृत्यू कधीचा वाट पाहत
चाललो घेउन तिथे जन्मास माझ्या

फूल त्याचे होउनी जाईल सुंदर
एकदा कर स्पर्श तू काट्यास माझ्या

मी इथे नसल्यावरी समजेल नक्की
अर्थ होता का कधी असण्यास माझ्या
By: via माझं खूप प्रेम आहे तुझ्यावर.....।।